Rreth 200 të ftuar u mblodhën me rastin e Ditës Kombëtare të Zvicrës, me këtë vit që shënon 175-vjetorin e veçantë të kushtetutës së miratuar në 1848. Kushtetuta e re hodhi themelet për Zvicrën e sotme: një shtet federal modern dhe demokracinë e parë të drejtpërdrejtë në Evropë.

Fjala e ambasadores Huber:

Të nderuar anëtarë të qeverisë,

Të nderuar përfaqësues të Trupit Diplomatik, Krerë të Bashkësive Fetare,

Të nderuar partnerë, të ftuar dhe miq të Zvicrës,

Të nderuar bashkëqytetarë zviceranë,

Grüezi mitenand, bienvenus, benvenuti, mirë-se-erdhët!

Faleminderit të gjithëve që u bashkuat me ne sot – pavarësisht vapës së korrikut.

Çfarë festojmë sot?

Përveç festimit vjetor të Ditës sonë Kombëtare, që zyrtarisht është 1 gushti, ne festojmë këtë vit një moment historik të veçantë: 175 vjet më parë, në 1848, në mes të trazirave dhe revolucioneve në Evropë dhe pas një lufte të shkurtër civile, Zvicra miratoi një kushtetutë të re federale.

Ju mund të pyesni, pse është kjo kaq e rëndësishme?

Kushtetuta e vitit 1848 vendosi themelet për shtetin modern federal zviceran, siç është sot. Me disa ndryshime dhe shtesa, kjo kushtetutë është e vlefshme edhe sot. Ajo mundësoi dy zhvillime të mëdha:

Së pari, Zvicra kaloi nga një aleancë sigurie e kantoneve në një shtet federal me një ndarje pushteti midis qeverisë qendrore dhe kantoneve; me kompetenca të konsiderueshme që u jepen kantoneve për të qeverisur punët e tyre.

Së dyti, kushtetuta prezantoi një parlament me dy dhoma dhe gjithashtu demokraci të drejtpërdrejtë, duke i lejuar qytetarët zviceranë të kenë fjalën në vendime të rëndësishme politike përmes referendumeve dhe nismave. Dhe ajo e njohu Zvicrën si një komb shumëgjuhësh dhe shumëkulturor.

Këta elementë hodhën bazat për stabilitetin politik dhe zhvillimin ekonomik që gëzon vendi ynë që atëherë.

Por duhet të pranojmë gjithashtu se sistemi i prezantuar në 1848 nuk ishte i përsosur. E drejta e grave për të votuar u prezantua në nivel kombëtar vetëm në vitin 1971. Kjo do të thotë, kur linda unë, nëna ime nuk kishte ende të drejtën e votës!

Ndërsa Zvicra feston 175 vjetorin e kushtetutës së saj, është e rëndësishme që të mos mbështetemi me krenari për sistemin tonë, por të jemi të ndërgjegjshëm se demokracia nuk është e garantuar dhe nuk mund të merret si e mirëqenë. Ajo ka nevojë për ndërgjegjësim të vazhdueshëm, edukim qytetar dhe përmirësim.

Aq më tepër në botën e sotme, me një luftë në Evropë, me një gërryerje të vlerave demokratike në në shumë vende dhe me kriza të shumta globale, ne të gjithë duhet të vazhdojmë të punojmë për respektimin e të drejtave themelore dhe sistemeve demokratike, të cilat sigurojnë një jetë me dinjitet për të gjithë – në Zvicër, në Shqipëri dhe në mbarë botën.

Të nderuar miq,

Zvicra dhe Shqipëria gëzojnë lidhje të forta dhe vlera të përbashkëta. Siç e dini shumë prej jush, një pjesë e madhe e punës së Ambasadës sonë përqendrohet në zbatimin e programit të bashkëpunimit në mbështetje të demokracisë së Shqipërisë dhe zhvillimit të saj ekonomik.

Ndërsa hedh vështrimin tim prapa në vitin tim të parë në Shqipëri, jam e lumtur që kam nënshkruar shumë marrëveshje të reja projektesh në kuadër të programit tonë 4-vjeçar të bashkëpunimit. Nuk kemi kohë të përmendim të gjitha projektet, por një fushë kyçe është qartësisht qeverisja demokratike dhe ekonomike, me projekte që forcojnë institucionet kyçe si Parlamenti Kombëtar, Bashkitë dhe Këshillat Vendore, Banka Qendrore, Kontrolli i Shtetit, Komisioni Qendror i Zgjedhjeve. - dhe mbështetjen e shoqërisë civile.

Qeverisja Demokratike është kyçe në rrugën e Shqipërisë drejt integrimit europian.

Të nderuar pjesëmarrës,

Do të doja të nënvizoja një aspekt tjetër të lidhjeve të forta midis Zvicrës dhe Shqipërisë: Numri i të ardhurve nga vizitorët zviceranë në Shqipëri është pothuajse trefishuar në 10 vitet e fundit.

Një arsye është sigurisht fakti që tani janë 3 linja ajrore që lidhin vendet tona me fluturime direkte në Zyrih, Bazel dhe Gjenevë.

dhe ka qartësisht një interes në rritje në publikun e gjerë për Shqipërinë si një destinacion turistik, nga malet tek vendet kulturore dhe bregdeti.

Por një arsye tjetër – dhe një lidhje e veçantë mes vendeve tona – është sigurisht edhe numri i lartë i banorëve zviceranë dhe shtetasve me origjinë shqiptare. Shqipja është sot gjuha e 4-të më e folur në Zvicër.

Pres me padurim rritjen e mëtejshme të numrit të vizitorëve, më shumë kontakte mes njerëzve dhe më shumë lidhje ekonomike dhe kulturore.

Të dashur partnerë dhe miq,

Pritja jonë sot nuk do të ishte e mundur pa kontributin e sponsorëve tanë: kompanive zvicerane SGS dhe SICPA, Dhomës së Tregtisë Zvicerano-Shqiptare SWISSA dhe studios ligjore TashkoPustina.

Falënderim i veçantë shkon për Emergency Rescue Albania, ERA, një nismë e Fondacionit Zviceran për Inovacionin që ka krijuar një shembull të shkëlqyer se si duhet të funksionojnë shërbimet e urgjencës. Ata sot ofrojnë një kontribut në natyrë përmes pranisë së tyre këtu, në pjesën e prapme të ndërtesës, gati për t’u përballur me çdo urgjencë.

Të gjithë shtetasve zviceranë që jetojnë e punojnë në Shqipëri, ju uroj:

“Es schöns Fest”!

Une bonne fête nationale!

Buona festa nazionale!

Dhe me këtë ju ftoj të gjithëve të shijojmë ushqimin dhe pijet – të cilat do t’i gjeni në anët e ndërtesës, dhe veçanërisht specialitetin tone zviceran: raclette!

Le të ngremë një dolli dhe të festojmë. Gëzuar festën!