Operatori shtetëror për gazin në Shqipëri Albgaz sh.a. së bashku me kompaninë italiane SNAM s.p.a nënshkruan një marrëveshje me Gazsjellësin Trans Adriatik (TAP) për shërbimet e mirëmbajtjes për pjesën e linjës së tubacioneve që kalon nëpër Shqipëri. Të pranishëm në aktivitet ishin Ministri i Infrastrukturës dhe Energjisë Damian Gjiknuri, Ambasadori zviceran Adrian Maître dhe Ambasadori italian Alberto Cutillo.
“ Për herë të parë një kompani shqiptare si Albgaz, me ndihmën e asaj italiane SNAM do mund të marrë përsipër kryerjen e një shërbimi për një projekt kaq të madh e të rëndëssihëm si gazsjellësi TAP. Krijohet një vlerë e shtuar jo vetëm nga pikëpamja ekonomike por mbi të gjitha nga ajo që Shqipëria ka nevojë, mbajtjen e njerëzve të kualifikuar brenda vendit”, tha ministri Gjiknuri.
Drejtori i Albgaz Arbër Avrami falënderoi qeverinë zvicerane për dhënien e asistencës përmes SECO-s, dhe tha: “Marrëveshja e Mirëmbajtes, e para e këtij lloji në Shqipëri, nënshkruhet midis TAP dhe Albania Gas Services Company për një periudhë fillestare 7 vjet, me një staf fillestar prej 52 të punësuarish, 90% të të cilëve të rinj shqiptare".
U deshën mbi gjasthë muaj me negociata dhe përgatitje për këtë marrëveshje shumëpalëshe që të finalizohej. Një volum i madh me mbështetje dhe asistencë të financuar nga Sekretariati Zviceran i Shtetit për Çështje Ekonomike (SECO) shkoi drejt kësaj marrëveshjeje, përmes rishikimeve dhe shtesës së seksioneve që sjellin përfitime për qeverinë dhe publikun shqiptar.
Një projekt prej 6 milion franga zvicerane është aktiv që nga 2015 për të ndërtuar kapacitete në qeverinë shqiptare për menaxhimin e infrastrukturës së gazit dhe maksimizimin e përfitimeve nga investime si TAP. Ekspertët e punësuar nga projekti asistojnë Ministrinë, institucionet e varura prej saj (si Albgaz) dhe specialistët e gazit përmes njohurive dhe asistencës teknike, ligjore dhe komerciale.
